Тој нагласи дека од утре ќе има леб од 33 денари и дека ќе ја почитуваат владината одлука и уште еднаш повтори дека правно ќе ја водат битката за надомест на штетата која им се нанесува
Групацијата на мелничко-пекарската индустрија донесе одлука од утре да прекине со штрајкот и да почне да произведува и да доставува бел и полубел леб по замрзната цена од 33 денари. Од друга страна, битката против владината одлука, како што соопшти претседателот на Групацијата Горан Малишиќ, ќе ја водат на правна основа.
„Пекарската индустрија е жртва на безумието и одлуките кои се носат се на штета на пекарската индустрија. Одлуките кои Владата ги донесе прават огромни штети и загуби на индустријата на месечно ниво кои се во износ од над 1,5 милиони евра. Поради наметнатите загуби пекарската индустрија е принудена да се прилагоди и истите да ги намали со одредени видови на леб, но и да намали во бројот на вработени за да опстане во иднина. На овој начин индустријата во наредните три месеци, ако остане одлуката само за три месеци, ќе бара начин да опстане. Владата како и пред носењето на одлуките така и по нивното носење повеќе е од очигледно дека нема чувство за новонастаната ситуација и при тоа е свесна дека со ваквите популистички мерки уништува стратешка индустрија. Доколку оваа одлука помине сега во делот на производството на леб, тогаш истото ќе се случи и со остатокот на прехранбената индустрија за што веќе сведочат и денешните изјави на премиерот дека се планира замрзнување на цените на производите и на останатите производи“,
рече Малишиќ по денешниот состанок на членовите на Групацијата откако Владата донесе одлука со која ги обврза трговците и производителите на леб да обезбедат леб по замрзната цена.
Тој истакна дека се во интензивни консултации со правници, бидејќи владините одлуки се незаконски и неуставни.
„Од 1 декември до крајот на февруари, не е утврдено никакво прекршување од наша страна. Ќе започнеме правна постапка за надомест на штетата која според првичните проценки, до 31 мај ќе достигне до 4,5 милиони евра. Од утре ќе почнеме со производство и испорака на одреден вид леб, согласно капацитетите, за да им излеземе во пресрет на потрошувачите“,
рече Малишиќ.
Тој нагласи дека од утре ќе има леб од 33 денари и дека ќе ја почитуваат владината одлука и уште еднаш повтори дека правно ќе ја водат битката за надомест на штетата која им се нанесува.
Во следната недела ќе почнеме интензивни консултации за правна постапка, додаде тој.
На прашањето, колку чини еден леб, Малишиќ немаше конкретен одговор.
„Секоја компанија си има свои пресметки во зависност од големината, од вработените. Никој не може да тврди колку чини еден леб. Тоа ако е така сите ќе отворат пекари и ќе мислат дека има профит. Тоа компаниите може да ви кажат, има вработени по 200, 300, 400… прават разни лебови, лебовите не чинат исто ако се бел или полубел, квалитетот е различен, пакувањата се различни, дистрибуцијата е различна, залихите се различни. Значи нема одговор на таквото прашање“,
посочи тој.
На новинарско прашање, колку компании не испорачуваат леб во продавниците, Малишиќ рече:
„Видете, тука сите беа согласни. Малите пекари кои не беа присутни и некои што не се согласуваа, тоа е право на секого, почнаа да испорачуваат. Останаа пекарите што не испорачуваат, што донесоа одлука и останаа на тоа. Колку компании во бројка не можам да кажам, има многу мали и по градовите што не произведуваат леб, има и големи што не произведуваат. Има и што произведуваат. Така што, тоа е тоа. Не се сите членки на здружението“.
На прашањето, како е можно на пекарите во Штип да им се исплати, а во Скопје да не им се исплати да продаваат леб за 33 денари, Малишиќ им порача на новинарите да ги прашаат нив.
ИЗВОР: 360stepeni.mk
