Собранието трет ден ќе расправа за Информацијата за Предлог-преговарачката рамка

3 mins read

Собранието трет ден ќе расправа за Информацијата за содржината на Предлог преговарачката рамка за пристапните преговори со Европската Унија, предложена од страна на француското Претседателство со Советот.

Расправата во изминатите два дена се одвиваше во тензична атмосфера. Опозицијата за време на обраќањата на пратениците од владејачкото мнозинство правеше врева, а имаше и вербални конфликти и меѓусебни обвинувања меѓу пратениците од власта и опозицијата.

Според списокот на пријавени пратеници, останати се уште тројца кои имаат право на збор, по што Собранието ќе треба да одлучува по Информацијата за содржината на Предлог преговарачката рамка за пристапните преговори на Република Северна Македонија со ЕУ.

Опозициските ВМРО-ДПМНЕ и Левица бараат отфрлање на овој предлог кој, според нив, води кон директна асимилација на македонскиот народ, уцени и повеќегодишно попречување на евроинтегративниот процес од страна на Бугарија. За разлика од нив, од владеачкиот табор смируваат дека преговарачката рамка нуди неповредливост на македонскиот идентитет и јазик и почеток на преговори за полноправно членство во ЕУ.

И премиерот Димитар Ковачевски од собраниската говорница на првиот ден од расправата порача дека со понудениот предлог, македонскиот јазик јасно се прецизира како единствен, признат и прифатен јазик за Европската Унија и дека не се остапува од црвените линии.

– Добиваме конечно, по 17 години чекање, и многу најави, и многу разочарувања по нив, официјален почеток на преговорите со средба на целата Влада со Европската Комисија. Со сите нишани и стандарди. Е тоа е, почитувани пратеници, единствената вистина во оваа олуја на манипулации, шпекулации, лажни вести и намерни и ненамерни штети и креирање криза и дестабилизација на државата. На ваков предлог, кој целосно ги отсликува нашите државни интереси и црвени линии, јас, Владата и претседателот на државата, кажав и кажавме ДА, потенцира Ковачевски.

Претседателката на Европската комисија, Урсула фон дер Лајен, која пред собраниската расправа се обрати пред пратениците, вчера на Твитер напиша – нема сомнеж дека македонскиот јазик е ваш јазик. Ние целосно го почитуваме тоа.

Заедно со пораката, Фон дер Лајен го ретвитна и делот од своето обраќање во Парламентот, каде пред пратениците порача – Иднината на вашата земја е во Европската Унија, а Европа не е цела без Северна Македонија. Ве сакаме во ЕУ! Ви благодарам.

Вицепремиерот за европски прашања Бојан Маричиќ во интервју за белградски „Блиц” нагласи дека францускиот предлог ги задоволува сите наши забелешки.

– Со изменетиот, пречистен, дополнет француски предлог, го добивме она за што се бориме со години – чиста формулација на македонскиот јазик, без никакви фусноти, ѕвездички или објаснувања, што за нас беше најважно во зачувувањето на нашите национални интереси, порача Маричиќ.

www.slobodenpecat.mk

Претходно

„Најдовме мал „бисер“ – оставина од Фреди“: Рок-групата „Квин“ најави објавување на песна стара 33 години

Следно

Уапсен најбараниот нарко бос во Мексико

Latest from Blog

MacedonianEnglishAlbanian