Османи: Секое одложување на ЕУ перспективите може да има сериозни регионални последици

2 mins read

Во седмиците што следат, одлуките донесени на ниво на ЕУ ќе бидат од суштинско значење за иднината на Западен Балкан и неговата ЕУ перспектива. Секое натамошното одложување на овој пат може да има сериозни регионални последици, порача денеска шефот на дипломатијата Бујар Османи во обраќање на Форумот за односите меѓу Европската Унија и Балканот (EU meets Balkans) во Софија.

Османи, како што соопшти МНР, говореше на панелот „Придобивки од интеграцијата”, што го модерираше поранешната висока претставничка на ЕУ за надворешни работи и безбедносна политика Фередика Могерини, а збор зедоа и министерките за надворешни работи од Албанија и Косово, замениците министри за надворешни работи на Босна и Херцеговина и Турција и еврокомесарот за соседска политика и проширување, Оливер Вархеји.

– Придобивките од интеграцијата во ЕУ се повеќекратни и ние ги живееме речиси 20 години, но тие треба да продолжат, да се негуваат и да се доведат на повисоко ниво – почеток на пристапните преговори, што следствено ќе има поголем трансформативен и мобилизациски ефект, рече Османи.

Тој порача дека евроинтеграцијата значи подобро справување со заедничките предизвици и уште поважно запечатување на припадноста во семејството на слободниот, демократски и прогресивен свет.

Форумот за односите меѓу Европската унија и Балканот (EU meets Balkans) е во организација на АЛДЕ – Алијансата на либерали и демократи за Европа, Атланскиот совет на Бугарија и Европскиот либерален форум и кофинансиран од Европскиот парламент, а на кој учествуваат политичари, високи официјални претставници од ЕУ и од регионот и експерти.

www.slobodenpecat.mk

Претходно

Сопругата на Брус Вилис сподели подарок од обожавател: Сè уште ништо не е изгубено

Следно

ЕК бара подолг рок за приватните пораки меѓу фон дер Лајен и шефот на Фајзер

Latest from Blog

MacedonianEnglishAlbanian