Албанскиот јазик да се наведе наместо условот „20 проценти“

4 mins read

Според Аријанит Хоџа од Беса, формулацијата со проценти е навредлива и нејзиното отстранување како правен термин ќе ја зголеми довербата меѓу заедниците во државата.

Партиите на Албанците најавуваат дека во првата наредна можност, кога ќе се отвори Уставот, ќе бараат од него да се тргне квотата од 20 проценти со која, според нив, се опишува албанскиот јазик. Според Уставот, официјален јазик во Република Северна Македонија е македонскиот, а покрај него, во службена употреба во органите на државната управа може да се користи и јазик на кој зборуваат најмалку 20 отсто од жителите во одредена локална самоуправа.

Ова прашање беше актуализирано во неколку наврати изминативе години. По објавување на резултатите од пописот, неколку лидери на партиите на Албанците ја повторија заложбата да се брише формулацијата „20 отсто“.

Лидерот на Демократската унија за интеграција (ДУИ) Али Ахмети изјави дека „има добра волја од сите партии за ова прашање“.

– Формулацијата 20 проценти треба добро да се објасни. Тоа е инсталирано во Уставот како момент за да се постигне компромис, бидејќи 20 проценти во Уставот на државата не го ризикува унапредувањето на прашањата поврзани со Албанците. Сме направиле компромис и сме биле сигурни дека со текот на времето ќе дојде подобар момент ова прашање да се промени, има политичка волја од сите страни. Првиот момент кога ќе се отвора Уставот за други прашања, треба да се регулира и ова прашање – изјави Ахмети.

Според Зијадин Села, лидер на Алијанса за Албанците, уставните измени не треба да зависат од резултатите на пописот. Според него, Уставот треба да претрпи измени.

Според Аријанит Хоџа од Беса, формулацијата со проценти е навредлива и нејзиното отстранување како правен термин ќе ја зголеми довербата меѓу заедниците во државата.

– Апсолутно во секоја иницијатива за отворање на Уставот, ние ќе го отвораме ова прашање и ќе работиме да се најде решение. Но, за да се отвори Уставот, потребни се 80 гласови во Собранието, за кои треба политички консензус – изјави Хоџа.

Претседателот на Алтернатива Африм Гаши за Дојче веле изјави дека формулацијата од „20 проценти“ е навредлива и очекува партии на Македонците да предложат резолуција со која ќе се побара промена на оваа формулација.

Лидерот на Партијата за движење на Турците (ТХП) Енес Ибрахими вели дека во случај да се отвори Уставот и да се отстрани квотата 20 проценти, тогаш нивната партија ќе бара начин да се заштитат правата на сите заедници во државата.

– Во случај да има уставни промени, ние ќе бараме да се најде начин или модалитет за користење на турскиот јазик како службен јазик во општините каде што оваа заедница е мнозинство или е над 20 проценти – изјави Ибрахими за „Слободен печат“.

„Ставот на СДСМ е јасен, за какви било измени на изборниот модел, иницијативи за уставни измени или слично, потребен е широк политички и општествен консензус“, одговорија од СДСМ на прашање од „Слободен печат“.

ВМРО-ДПМНЕ засега не се изјаснува за ова прашања. Претседателот на оваа партија Христијан Мицкоски, своевремено во интервју за весникот „Коха“ рече дека и нему му пречат бројките и дека треба да се разговара за нивно укинување.

„Моето образование сум го стекнал надвор од државата и не сум сакал да ме третираат како бројка. И тука, апсолутно се согласувам и сакам овој процент да се тргне. Бројките не се потребни, никој не треба да биде контекстиран како бројка“ – изјави Мицкоски.

www.slobodenpecat.mk

Претходно

Можно е Мбапе да не направи трансфер во Реал Мадрид

Следно

Битиќи: Државата ги презеде сите механизми што ги има в раце за спроведување на антикризните мерки

Latest from Blog

MacedonianEnglishAlbanian