МНР: Сѐ уште има активни коридори за евакуација за нашите државјани во Украина

2 mins read

Две семејства со наши државјани од Одеса, Украина веќе се дел од коридорот обезбеден преку координација со Владата на Република Бугарија и очекуваме во текот на денот да пристигнат во Бугарија, соопшти Министерството за надворешни работи.

Во контекст на истата соработка, од МНР упатуваат апел до нашите граѓани кои се наоѓаат на територијата на Украина, доколку се во можност, да се упатат во Одеса, во просториите на Генералниот Конзулат на Република Бугарија, од каде сѐ уште има активни коридори за евакуација.

– Во постојан контакт сме со властите на Романија и Унгарија, од каде исто така е остварена соработка и овозможена асистенција за нашите државјани кои се наоѓаат во Украина. Граѓаните кои се во можност треба да се упатат во западниот дел на Украина, кон Конзулатите на Романија во Солотвино и Чернаути, како и кон конзулатите на Унгарија во Узгород, Берегове и Мукачево, информира МНР.

На овие локации, посочуваат, ќе им биде пружена дополнителна помош и асистенција во насока на нивна евакуација од Украина преку овие земји.

– Во постојан контакт сме и со властите во Молдавија, од каде исто така имаме добиено потврда за вклучување на нашите државјани во евентуалните нивни коридори за евакуација. МНР е во постојана комуникација со сите наши партнери и се прават напори да се обезбедат и други безбедносни коридори/конвои, се вели во соопштението.

Во таа насока, од МНР информираат дека е активиран и механизмот на ЕУ за цивилна заштита, и за евентуално новите воспоставени коридори дополнително ќе информираат.

– Оние наши државјани кои сѐ уште не оставиле свои податоци, веднаш да го контактираат Министерството за надворешни работи, со цел достава на прецизни податоци и информации за нивната локација и состојба, со цел да се оствари можност да бидат дел од координацијата на процесот за евакуација. Потсетуваме дека дежурниот телефонски број +389 75 273 732 е постојано активен, наведуваат од МНР.

www.slobodenpecat.mk

Претходно

Официјално: Биелса не е повеќе менаџер на Лидс

Следно

Дајте музика со најпосетениот музички концерт досега во Ист Гејт Мол

Latest from Blog

MacedonianEnglishAlbanian