Радуловиќ:  Испишавме историја со момците, игравме четири финалиња и три пари го кренавме пехарот…

3 mins read

Управата на МЗТ Скопје, денеска неочекувано се одлучи да го смени Дарко Радуловиќ од тренерската позиција. Челниците на МЗТ Скопје како причина за отказот го наведоа поразот во финалето на купот „Благоја Георгиевски-Буштур“ од ТФТ иако младиот стратег оствари големи успеси откако минатата година седна на клупата на „металците“.

Радуловиќ минатата сезона ја освои двојната круна во мак баскетот, а сезонава „металците“ играат одлично и во АБА2 лигата каде се наоѓаат на второто место.

Радуловиќ со соопштение до јавноста се прости од МЗТ Скопје, клубот и навивачите, а како причина за послабите резултати на екипата во последно време го истакнува заминувањето на Дастин Вер, како и заморот кај кошаркарите од пеколниот ритам на три фронта.

„Со МЗТ Скопје Аеродром како главен тренер сум од март 2021 година при што од тој момент во сите натпреварувања во рамките на македонското првенство, Купот и Суперкупот и на регионалната АБА 2 лига имаме резултат 44 победи и 13 порази, односно освоени Куп и првенство во сезоната 2020/21 и освоен Суперкуп пред почеток на сезоната 2021/22. Вклучувајќи го Купот оваа сезона, со МЗТ Скопје Аеродром стигнавме до 4 финалиња од кои во 3 го кренавме победничкиот пехар. Со сите играчи и стручниот штаб се вложивме максимално, неуморно и создадовме неверојатна тимска хемија заснована на меѓусебна доверба и почит, како меѓу самите играчи така и во односот играч-тренер во кој сепак се почитуваше хиерархиската поставеност.

Поради неисплатените обврски кон играчите со доаѓањето на новата управа на почетокот на оваа година, се создаде недоверба кај играчите и тоа резултираше со заминување на Дастин Вер и покрај нашиот добар однос и меѓусебната доверба. Ова претставуваше сериозен удар за круцијалната позиција во тимот (плејмејкер) или „генералот на теренот“, по што бевме ставени во незавидна ситуација да бараме играч на пазарот за неверојатно краток период (2-3 дена) и тоа во делот од сезоната кога квалитетните играчи се врзани со договори, а сето ова непосредно пред вториот балон на АБА 2 лигата и Куп натпреварувањето. И покрај тоа, продолживме со успешни настапи и победи во двете натпреварувања, но отсуството на Вер беше повеќе од очигледно, а тоа дополнително влијаеше и на целата екипа. Но, оваа екипа се борела максимално и секогаш целела кон врвот на остварување на највисок пласман во сите натпреварувања за што говорат и резултатите на табелата, и покрај неверојатно густиот распоред на натпревари кој ни беше наметнат во досегашниот тек на сезоната. А данокот за тоа го плативме со поразот во Купот, меѓу другите објективни фактори.

И на крајот, би сакал да им посакам успех на играчите кои лично ги селектирав и во кои имам  целосна доверба – тоа се врвни професионалци и одлични момци кои несебично се вложија да ја испишеме успешната спортска приказна на МЗТ Скопје Аеродром во последниве две сезони и со кои преку победите добивавме на резултат а со попатните порази добивавме на карактер“, стои во соопштението на Радуловиќ.

 

www.slobodenpecat.mk

Претходно

ВИДЕО+ФОТО | Запознајте ја Чали, двојничката на Ким Кардашијан: Дали Пит Дејвидсон може да ги разликува?

Следно

Мехмедовиќ: Трудниците да ја сфатат ситуацијата сериозно и да се вакцинираат

Latest from Blog

MacedonianEnglishAlbanian