Ивановска: Државата да ги заштити граѓаните на чие име политичарите бараат да префрлат имот

3 mins read

Со законот за потекло на имот треба да се овозможи граѓаните да се заштитат од притисоци од функционери кои ќе бараат од нив имотот да го стават на нивно име, порача претседателката на Државната комисија за спречување на корупцијата, Билјана Ивановска.

Таа во гостување на ТВ Сител вечерва посочи дека веќе е направена драфт-верзијата на законот за потекло на имотната состојба на функционери и оти понатаму сѐ зависи од расположението на пратениците во Собранието. Но, како што рече Ивановска, она што ДКСК го заговараше и сакаше да го постигне како цел со овој закон, не е предвидено децидно во законот, а тоа е неговата превентивна улога – граѓаните треба да се заштитат од притисоци од функционери кои што ќе бараат од нив имотот да го стават на нивно име.

Ивановска посочи дека треба да се опфати тој дел, потенцирајќи дека ДКСК е против прагот од 30 илјади евра, бидејќи според неа, познавајќи го нашиот менталитет, секој ќе има имот под 29.900 и нема да може да се запленува.

– Едно е да се подготви, а втората фаза во Собранието не можам да кажам. Знаете како е во Собранието. Пред се, зависи од расположението на пратениците и чии интереси тие ќе застапуваат. Затоа што најголемите пречки, односно оние кои се најмногу против донесување на овој закон со образложение дека има се во другите закони, не дека нема, но факт е дека не се применуваат и другите закони како што треба, се оние кои баш и не сакаат многу да кажат од каде им е имотот, рече таа.

Прашана дали смета дека треба со законски измени да се воведе пракса секој кој презема јавна функција да поднесува изјави за непромена на имотната состојба рече дека не гледа целисходност од такво нешто.

– Сметам дека проблемот е поголем. Изјавите од тој тип не ја гледам целисходноста. Од каде ќе знаеме што ќе ни се случи. А изјавите ќе си дојдат сами по себе. Ќе се споредат податоците. И не дека изјавата е некаква гаранција. Проблемот е поголем. Може да даде десет изјави дека нема промена во имотната состојба и да го препише имотот на некој друг. Ние затоа и го баравме и законот за потекло на имот. Тоа е првиот ризик. Јас знам функционери кои што имаат имоти, а не ги пријавуваат во нивно име, бидејќи се напишани во друго име. Затоа, ние бараме секој граѓанин да се искаже од каде му е имотот. Во тој случај, тие луѓе што не се службени лица или функционери, многу лесно ќе им биде да ги одбијат таканаречените пријатели кои што ќе побараат во нивно име да биде запишан имотот, рече Ивановска.

www.slobodenpecat.mk

Претходно

ВИДЕО: Алиоски придонесе во новиот триумф на Ал Ахли

Следно

ВМРО-ДПМНЕ: Првата антикорупционерка потврди дека функционери имаат имот кој не го пријавуваат, ЈО да истражи дали е купен со парите од криминалните тендери

Latest from Blog

MacedonianEnglishAlbanian