Охрид СОС: Општина Охрид повторно ќе легализира дивоградби на штета на Охридското езеро и светското наследство

4 mins read

Советот на Општина Охрид на седницата закажана за денеска треба да одлучува за легализација на дивоградби, од кои некои во непосредна близина на Охридско Езеро и во Националниот парк Галичица, алармира Охрид СОС.

Според охридските екологисти „тоа значи дека, советот ќе легализира објекти спротивно на одлуката која самиот ја донел пред еден месец!“

-Имено, член 5 од одлуката на Советот од 29.12.2021 г. вели: „Постапките за утврдување на правен статус на бесправно изградени објекти времено се прекинуваат во крајбрежниот појас на Охридското езеро дефиниран со Планот за управување со Светското природно и културно наследство на Охридскиот регион со Акциски план (2020-2029) и во рамките на Студенчишко блато – согласно ГУП на Охрид, УЗ 17 УБ 17.1 (строго заштитена зона-Студенчишта).“ (Сл. Гласник 17/2021). Во крајбрежниот појас од 50 метри, којшто е назначен во Планот за управување до донесувањето на Урбанистичкиот план за крајбрежје, секако не дозволува ниту изградба, најмалку легализација. Истиот појас е заштитен и со Закон за водите. Така што одлуката на Советот, доколку се земат само 50-те метри е бесмислена и не значи ништо за заштита на вредностите на регионот, реагираат од Охрид СОС преку Фејсбук.

Екологистите сметаат дека членовите на Советот мора да се запознаени со статусот на крајбрежјето, а тоа е дека за крајбрежјето во подготовка е Урбанистички план за крајбрежје со кој ќе се утврдат границите на крајбрежниот појас и согласно тоа, условите за планирање.

-Дотогаш, било какви постапки во насока на поголема урбанизација во најосетливите предели околу Езерото, може да се сметаат само за спротивни на Планот за управување. Уште поважно, ваквата легализација е спротивна на препораките на УНЕСКО, при што за нелегалните градби треба да се изработи Оцена за влијанието врз животната средина и Оцена за влијанието врз културното наследство и согласно тоа, да се одлучува дали објектот може да се легализира или не. Сопирање на нелегалната градба е исто така една од препораките на УНЕСКО уште од 2017 година, но досега ни од тоа ништо не сме виделе, реагираат од Охрид СОС.

Според нив во Законот за управување со природното и културното наследство во Охридскиот Регион стои дека „при управувањето со светското природно и културно наследство во Охридскиот регион ќе се применуваат најстрогите мерки и стандарди со цел за заштита на животната средина и заштита на природното и културното наследство.

„Досега гледаме дека советите на Општина Охрид, со ред, најдлабоко се поклонуваат само пред законот за легализација. Манипулациите со законите и Планот за управување, заобиколување на препораките на Центарот за светско наследство, глумење загриженост пред УНЕСКО, станаа наше срамно обележје. Затоа, го повикуваме градоначалникот Пецаков, како и членовите на Советот, точките на дневен ред кои се однесуваат на легализација на бесправно изградени објекти, особено во близина на Езерото, во националниот парк и во сега неурбанизирани подрачја, да се симнат од дневен ред, а процесите да се водат во насока на заштита. Потсетуваме дека, согласно законот, Општина Охрид е одговорна за состојбата со светското наследство кое може да го користи САМО „на начин кој овозможува негово зачувување во изворна состојба, зачувување и обновување на постојната биолошка и пределска разновидност во состојба на природна рамнотежа и обезбедување на одржливо користење на природното наследство во интерес на сегашниот и идниот развој“, соопштува оваа граѓанска иницијатива за спас на Охридското езеро.

Легализација во непосредна близина на Охридското Езеро и во Националниот парк Галичица е постапување директно спротивно на начелата за заштита на Исклучителната универзална вредност на Охридскиот Регион чиј УНЕСКО статус виси токму како резултат на вакви практики, предупредуваат од Охрид СОС.

www.slobodenpecat.mk

Претходно

Андреас Трајковски доби дозвола, ќе се натпреварува под македонско знаме

Следно

Приведени тројца криумчари, пронајдени мигранти

Latest from Blog

MacedonianEnglishAlbanian