Американецот Дастин Вер повеќе не е кошаркар на МЗТ Скопје Аеродром, откако вечерва потпиша спогодбен раскин на договорот со клубот, по кој ниту една од двете страни немаат понатамошни обврски една кон друга.
Тој со добрите игри на турнирите во АБА2-лигата го привлече вниманието на побогати екипи од далеку посилни првенства, нешто што придонесе да се намали неговата желба да го носи „сино-белиот“ дрес.
– Како и во многу слични случаеви претходно, не сакавме во своите редови да имаме играч, кој не е целосно фокусиран на обврските кон нашиот тим и кој не го дава својот максимум, особено на средбите од домашниот шампионат, поради што прифативме прекин на соработката – известуваат од клубот.
МЗТ Скопје Аеродром веднаш почна со потрага на неговата замена, со надеж дека ќе најде уште подобро решение, односно играч кој покрај тоа што ќе игра добро во АБА2, воопшто нема да ги потцени македонските натпреварувања, каде што традиционално атакува на трофеите во првенството и во Купот на Македонија.
Моментно во АБА2 лигата после седум натпревари МЗТ е на второто место со 13 бодови, еден помалку зад водечкиот Борац од Србија.
