Задолжителна вакцинација за сите британски здравствени работници

1 min read

Сите здравствени работници во Англија ќе мора да се вакцинираат против ковид-19 до 1 април, изјави министерот за здравство Саџид Џавид.

Така, вакцините станаа задолжителен услов за вработување за оние кои се на првата линија на Националната здравствена служба NHS, а со тој потег Англија ги следи Франција, Италија и некои американски земји во обврзувањето на здравствените работници да се вакцинираат, пренесува Гардијан.

„Сите што работат во НЗС и социјалната заштита ќе мора да се вакцинираат. Мора да избегнеме штета што може да се спречи и да ги заштитиме пациентите, колегите и, се разбира, самата НЗС“ рече Џавид во парламентот.

Тој најави дека примената на оваа регулатива ќе започне од 1-ви април.

Џавид посочи дека ослободување од задолжителна вакцинација ќе има за лицата кои не можат да се вакцинираат од медицински причини, како и за оние кои немаат контакт лице во лице со пациенти.

Потегот уследи по сличната одлука вакцините против ковид-19 да бидат задолжителни за работниците во старечките домови, која стапува на сила во четврток (11-ти ноември).

Џавид изјави дека при консултациите за здравствените работници се размислувало и за задолжителни вакцини против грип. Сепак, тој нагласи дека во оваа фаза нема да воведе услови за вакцинација против грип, но додаде дека опцијата е отворена.

Британскиот министер за здравство Саџид Џавид/ Фото EPA-EFE/NEIL HALL

www.slobodenpecat.mk

Претходно

Арсовска се сретна со кандидатите за градоначалници на Скопје

Следно

Хоџа: Ќе гласаме против Владата, па потоа може да разговараме со СДСМ

Latest from Blog

MacedonianEnglishAlbanian