Ковид-состојба: Од оваа недела започнува тестирањето на 8200 ученици од основните и средните училишта

3 mins read

Во текот на вчерашниот ден направени се 3486 тестирања, а регистрирани се 316 нови случаи на ковид-19. Согласно податоците од Институтот за јавно здравје, регистрирани се десет починати лица, сите во болнички услови. Оздравеле 240 пациенти.

Најмногу случаи вчера се забележани во главниот град – 140, во Куманово се регистрирани 38 нови случаи, а најмалку – по еден случај вчера има во Радовиш, Виница, Крушево, Демир Хисар и Македонска Каменица.

Министерството за здравство информира дека заклучно со 9 октомври, вакцинирани се 795 186 граѓани, а ревакцинирани се 748 563. Во текот на викендот аплицирани се вкупно 4418 вакцини, од кои како прва доза се аплицирани 1132, а ревакцинирани се 3129.

Согласно податоците од Министерството, 53 проценти од граѓаните над 40-годишна возраст се вакцинирани со две дози, а 33 отсто од граѓаните на возраст од 18 до 39 години примиле барем една доза вакцина.

– Според бројот на аплицирани вакцини, 38 отсто од целата популација во нашата земја е вакцинирана, а 35 проценти од популацијата во државата примила две дози вакцина, соопшти Министерството за здравство.

Следејќи ги искуствата на европските земји и САД, Министерството препорачува трета доза „Фајзер“ на сите граѓани, без разлика на возраста и дали се хронично болни. Комитетот за имунизација препорача трета доза не само за лица над 60 години и за здравствени работници, туку и за кои било други граѓани доколку се изложени на ризик од ковид-19, поради тоа што имаат чести контакти на работа или приватно, без оглед на возраста и дали имаат или немаат хронични болести.

Податоците од Министерството покажуваат дека до 9 октомври трета доза примиле 782 граѓани.

Од оваа недела се очекува да започне и тестирање на 8200 ученици од основните и средните училишта. Тестирањето ќе се одвива по случаен избор од регистарот на Е-дневникот и е во согласност на нивните родители. Скринингот е предвиден да трае пет дена, а дневно да бидат тестирани по околу 1600 деца, во самите училишта од мобилни екипи. Тестирањето во средните и основни училишта, како што појаснуваат надлежните се одвива се со цел да се добие податок за евентуална трансмисија на вирусот во училиштата.

Досега во училиштата се вакцинирани околу 75 отсто од наставниците, додека настава на далечина следат околу два проценти од учениците, според податоците на Министерството за образование и наука.

Во земјата, заклучно со вчерашните податоци направени се вкупно 1 323 365 тестирања на ковид-19. Вкупната бројка на ковид-дијагностицирани лица во нашата земја од почетокот на епидемијата изнесува 194 891, бројката на оздравени пациенти е 181 031, на починати е 6831, а бројот на активни случаи изнесува 7029.

Во моментов, најмногу активни случаи има во Скопје – 3495, Куманово е на второ место со 636, во Велес има 297, во Охрид 233, во Штип 232.

Извор: МИА

www.slobodenpecat.mk

Претходно

ВИДЕО: По пожарите, Евија ја зафатија поплави – уништени домови и патишта

Следно

Демографска слика за Балканот: Во Србија бројот на раѓања е значително помал од бројот на смртни случаи

Latest from Blog

MacedonianEnglishAlbanian