Бомбаш-самоубиец денеска нападна џамија во североисточната авганистанска провинција Кундуз, при што загинаа голем број шиитски верници во третиот напад во земјата оваа недела врз верска институција.
Исламска држава ја презеде одговорноста за нападот за кој државната новинска агенција Бахтар соопшти дека загинале најмалку 46 лица, а ранети 143. Двајца здравствени претставници за Ројтерс изјавија дека бројот на жртвите може да биде помеѓу 70 и 80.
На видео снимките се гледаат тела опкружени со остатоци од џамијата, која ја користела малцинската шиитска муслиманска заедница.
Слични напади имаше и во последните неколку недели, а некои од нив ги презеде Исламската држава.
Нападите ги нагласуваат безбедносните предизвици со кои се соочуваат Талибанците, кои ја зазедоа земјата во август и оттогаш извршија операции против ќелиите на Исламската држава во Кабул.
Извор: Ројтерс
