Ахмети во Дебар: Се надевам на брзо решавање на спорот со Бугарија и почеток на преговорите со ЕУ

3 mins read

Во овие 20 години нашите напори беа насочени кон унапредување на кадри, зашто се стремиме кон Европската унија, зашто специјализиран кадар, спроведувањето на законот и борбата против корупцијата се патокази кон ЕУ. Министерот Бујар Османи е максимално ангажиран за надминување на спорот со бугарската страна, се надевам на брзо решение и почеток на преговорите со ЕУ, рече меѓу другото лидерот на ДУИ, Али Ахмети, на вечерашниот изборен митинг во Дебар.

Додаде дека изборите не треба да се гладијаторство, туку ден на празник, на кој дебрани и сите Албанци, како и до сега ќе покажат достоинствен и цивилизиран однос. Порача исто така дека минатото не треба да се заборави, но и никогаш да не се повтори.

Кандидатот за градоначалник Хекуран Дука, кој по вторпат ја бара довербата на дебрани, откако ги презентираше досегашните, како што оцени, успешно реализирани проекти, рече дека нема тука да застане, туку ќе продолжи за доброто на општината и жителите, презентирајќи ја изборната програма.

– Ова е програма, која Дебар ќе го однесе кон поголем развој, со поголема ангажраност и работа со цел унапредување на сите процеси на општествениот живот. Зелената агенда за Дебар ќе значи општина со поголеми надлежности, со повеќе финансии, со одговорно владеење, со појдовна основа – транспарентност, нула толеранција за негативни појави, во секој момент да се чуе гласот на секој граѓанин, рече меѓу другото Дука.

Додаде дека програмата предвидува постојано одржување на патната инфраструктура, споменувајќи притоа реконструкција на повеќе улици во градот и патни правци до повеќе населени места, регулирање на градските паркови и зеленила и секако поддршка за проекти на млади кои сакаат да отпочнат бизнис.

Пред дебрани се обрати и претседателот на македонскиот Парламент Талат Џафери, кој рече дека не се сомнева во изборот на дебрани и искажа убеденост дека тоа е Хекуран Дука и кандидатската листа за советници на ДУИ. Упати апел за „масовна и достоинствена излезност“ на 17 октомври.

Се обрати и вицепремиерот Артан Груби, кој рече дека не може некој кој живее во Скопје да сака да биде градоначалник на Дебар, кој не ги знае проблемите и потребите на дебрани, алудирајќи на кандидатот на Алијасата на Албанците-Алтернатива, кој е по потекло од Дебар, но живее и работи во Скопје.

Пред присутните беа претставени кандидатите за советници. Во нивно име носителот на листата Фуат Спахиу вети дека ќе работат одговорно и посветено во интерес на граѓаните.

www.slobodenpecat.mk

Претходно

Дојче Веле: Дали Полска тукушто објави дека си заминува од ЕУ?

Следно

 Меси ја отвори душата: Во ниту еден момент не помислував дека ќе си заминам од Барселона

Latest from Blog

MacedonianEnglishAlbanian