Потресно сведоштво на тетовчанка за „Слободен печат“: Низ прозорец татко ми и сестра ми последни излегоа живи од модуларната болница

2 mins read

Тетовчанката Јована К. за „Слободен печат“ раскажува дека нејзината сестра и нејзиниот татко, кој бил хоспитализиран со ковид во модуларната болница која изгоре синоќа, последни низ прозорец се спасиле од пламените јазици кои жестоко го зафатија овој ковид центар. Во пожарот, животот го загубија 14 лица, а уште 12 се повредени.

– Пожарот почна од собата веднаш до таа кај што лежеше татко ми. Сестра ми постојано плаче и е многу вознемирена. Таа беше со татко ми како придружба во модуларната болница во Тетово. Во модуларната болница при прием на ковид пациент ни кажаа да оставиме еден член од семејството како придружба, бидејќи нема доволно персонал. Во овој случај беше од помош, зашто тие што се спасија, се спасија благодарение на придружбата. Слушнав и дека имало мајка и ќерка кои изгореле затоа што ќерката не сакала да ја остави мајка си и изгореле заедно. Сестра ми, како што ми раскажа, со татко ми слушнале дека некој вика од другата соба, бидејќи некое девојче умирало. Пожарот настанал затоа што пробувале да го реанимираат девојчето. Додека ја реанимирале, пукнал штекерот. Неколку секунди потоа сестра ми слушнала панични извици дека има пожар. Сестра ми ја фатило паника, почнале да го кршат прозорецот за да излезат. Татко ми немаше станато од кревет откако е хоспитализиран. Паднал. Но, му помогнале да излезе.

Сестра ми како што кажа, таа и татко ми биле последните што излегле живи. Кога се свртела наназад не успеала да разбуди уште двајца, бидејќи нивната соба горела жестоко од сите страни. Плаче многу затоа што не успеала да ги спаси, да ги разбуди. Излегле надвор низ прозорец. Јас веднаш дојдов, донесовме концентратор за кислород за татко ми и го пренесоа на интерно. Се изнагледав луѓе изгорени, лешеви, многу повредени, тоа беше страшно. Таква глетка на никого не му посакувам да види. Болницата изгорела за неколку минути, во тие две минути кој успеал да се спаси, успеал, горело многу брзо, изјави таа за „Слободен печат“.

www.slobodenpecat.mk

Претходно

Брнабиќ и српската Влада изразија сочуство до фамилииите и граѓаните на Северна Македонија

Следно

Потресно сведоштво на тетовчанка за „Слободен печат“: Пожарот настанал затоа што пробувале да реанимираат девојче, пукнал штекерот

Latest from Blog

MacedonianEnglishAlbanian