Проширен опсегот на јавни функционери кои треба да ги објават службените трошења

во категорија Македонија од

Владата на денешната 64. седница донесе одлука со која се проширува опсегот на носители на јавни функции кои треба да ги објават службените трошења.

Како што соопшти владината прес-служба, Владата на седницата ја разгледа и ја усвои Информацијата за објавување на службените трошења на директорите и замениците на директорите на јавните претпријатија, самостојните органи на државната управа, правните лица со јавни овластувања, акционерските друштва во државна сопственост и органите во состав на Министерствата, на официјалните веб-страници.

Според владината одлука, најдоцна до 20.06.2018 година се задолжуваат директорите и замениците на директорите на самостојните органи на државната управа, на органите во состав на министерствата и на Инспекцискиот совет, на своите веб – страници да ги објават податоците за нивите службени трошоци за периодот од 01.12.2014 до 31.05.2015 година и за периодот од 01.12.2017 до 31.05.2018 година.

Истото, се наведува, им се укажува да го сторат и директорите и замениците на директорите на јавните претпријатија, правните лица со јавни овластувања и акционерски друштва во државна сопственост.

– Обврската за објава на службените трошења, на долг рок ќе обезбеди ефикасност во работењето на институциите, како и зголемена одговорност на власта, која работи транспарентно и отчетно без злоупотреба на државните ресурси, се наведува во соопштението од владината прес – служба.

Извор:http://www.alsat-m.tv/mk