На југот на Кина пронајдени илјадници фосили стари 518 милиони години

во категоријата Технологија

Научници открија илјадници “фасцинантно” сочувани фосили на брегот на реката Даншуи во провинцијата Хубеи во јужна Кина.

Се проценува дека фосилите се стари околу 518 милиони години и претставуваат ретко зачувани фосили на меки ткива како кожа, очи и внатрешни органи.

Палеонтолозите рекоа дека откритието е „неверојатно“, особено поради фактот дека повеќе од половина од фосилите припаѓаат на досега непознати видови.

Најдени се над 20.000 фосили, а досега се анализирани вкупно 4.351, вклучувајќи црви, медузи, морски корали и алги.

„Ова ќе биде многу важен извор на податоци во истражувањето на потеклото на живите суштества“, изјави за BBC Џинглијанг Џанг, еден од истражувачите и професор на Универзитетот Нортвест.

Роберт Гејнс, геолог кој исто така учествуваше во истражувањето, изјави дека ова откритие е многу значајно бидејќи „поголемиот дел од најдените фосили се на организми со меко ткиво кои обично немаат шанси да бидат фосилизирани.“

„Мекото ткиво најверојатно успеало да се фосилизира и зачува за време на бура во која за кратко време биле закопани во седимент“, смета Џанг.

Научниците најмногу се одушевени од фосилите на медузи и морски корали и велат дека досега не виделе ништо слично на нив.

Палеонтологот Алисон Дејли која не учествуваше во истражувањето, напиша анализа за списанието Science во која вели дека ова е „најважното откритие во изминатите 100 години“.

„Никогаш не сум помислила дека ќе доживеам да видам олку важно откритие. Ова е прв случај да се најдат толку добро зачувани медузи“, вели таа.

Истражувачкиот тим ги попишува преостанатите видови и работи на дополнителни ископувања за да собере дополнителни информации за древниот екосистем и процесот на фосилизација.

Извор: Klix.ba

ИЗВОР: https://usb.mk