Пожарот кој во доцните ноќни часови избувна во Општина Теарце е целосно ставен под контрола и изгаснат, информираат од Центарот за управување со кризи (ЦУК).
Во Општина Кичево, над селото Челопеци, пожарот кој вчера до 21:00 часот беше ставен под контрола и понатаму е под надзор на екипите. Според информациите, на кракот кон шумскиот појас има внатрешно согорување и чадење, но на терен се присутни пожарникари од Територијалната противпожарна единица Кичево и припадници на Армијата на Република Северна Македонија, кои ќе интервенираат доколку дојде до повторно реактивирање.
За справување со огнената стихија, вчера беа ангажирани три специјализирани возила на Дирекцијата за заштита и спасување (Пинцгауери), два хеликоптера на Министерството за внатрешни работи, еден хеликоптер на Армијата и два авиона „Ер трактор“ на ДЗС.
„Екипите остануваат на терен сè додека не се увериме дека нема опасност од повторно појавување на пожарите,“ изјави директорот на ЦУК, Мухамед Али.
ИЗВОР: ТВ 21
